محمد عبد العال يكتب : المَصْطَبَة الاقْتِصَاديَّة “24 “

"شمس الفضاء وزجاجات أم فوزي المشبرة"

المكان: مصطبة الحارة في مزرعة أبو أحمد، وسط الخضرة والهواء الطلق، وصينية الشاي بالنعناع دايرة على الجميع.

الحضور: أبو أحمد، خضرة زعزوعي، أم فوزي، فوزي تيكتوك، الحاج رمضان، وعبقرينو مصطبجي أول AI.

المشهد الأول: في مزرعة أبو أحمد.. والريل الفضائي

فوزي تيكتوك يدخل مسرعاً وهو يضبط الـ Ring Light ويومئ بهاتفه: “صباح الفل يا أحلى متابعين من قلب مزرعة أبو أحمد، بعد ما شفنا الريل العجيب بتاع إيلون ماسك اللي بيتكلم عن الطاقة الشمسية في الفضاء شغالة 24 ساعة من غير ليل ولا انقطاع، وتكلفتها أقل بـ 30%، الدنيا اتقلبت، الراجل عايز يشغل مراكز بيانات الذكاء الاصطناعي من الفضاء من غير ما تقف ثانية”.

خضرة زعزوعي تضرب كفاً بكف وتقف مندهشة وسط المزرعة:”يا نهار أبيض، 24 ساعة شمس من غير ليل؟، ده إحنا هنا في مزرعة أبو أحمد بنستنى المغرب عشان الهوا يرطب والزرع ياخد نفسه، يقوم الخواجة عايز يولّع لنا شمس ليل ونهار؟، بس استنى يا فوزي.. طالما الشمس هناك شغالة علطول ومن غير انقطاع، طب ما إحنا نركب شوية ألواح ونشيل “كانون الطبخ” بتاعنا ونطبخ على شمس الفضاء، على الأقل نوفر أنبوبة البوتاجاز ووجع القلب”.

أم فوزي تعدل طاقية الفيتو الحمراء المكتوب عليها VETO وتهتف بحماس مفاجئ: “لأ.. لأ.. استنوا هنا، المرة دي مفيش فيتو، المرة دي في بيزنس، أنا وفوزي هناخد أول رحلة مكوك.. “ستاركو شبشب” ونطلع فوق على سبيل التجربة، ونعمل مشروع لتعبئة الشمس في زجاجات”.

فوزي تيكتوك يضحك ويعدل كلامها بحماس: “ستاركو شبشب إيه يا أمي؟، اسمها ستارشيب Starship، ودي مش أي مركبة.. دي صاروخ ومركبة فضاء عملاقة من شركة سبيس إكس، وأهميتها إنها بتقلل تكلفة نقل الحمولة للفضاء بشكل ضخم، واللي يجنن فيها إنها بتروح محملة، وترجع محملة كامل وتنزل لوحدها على قعدتها ومنصتها بالمللي من غير ما تتكسر ولا تتهبد”.

أم فوزي تبتسم بفخر وتكمل بثقة:”ستارشيب ولا ستاركو شبشب، المهم توصلنا وتنزلنا على قعدتنا بالسلامة، وإحنا هناك هنعبي شمس صافية 24 قيراط من غير غيوم ولا تراب، ونعملها زجاجات شمس مشبرة — يعنى مثلجة رغم إنها معبأة بالشمس — ونصدرها لأهل القرية والمزرعة، ، إزاي هعملها مشبرة وهي شمس؟ ده سر الصنعة بتاعتي أنا، واللي عايز يجرب يفتح القزازة ويشوف”.

خضرة زعزوعي تضحك وتهز رأسها:”زجاجة شمس مثلجة ومشيرة؟! ده إنتي لو فتحتيها في عز الحر هتعمل شورت في الجو وهتحير الدكاترة”.

المشهد الثاني: سؤال الحاج رمضان.. وتحليل أبو أحمد

الحاج رمضان ينفث دخان الشيشة بهدوء ويلتفت مستغرباً:”طب بالراحة علينا يا ولاد.. أنا راجل كبير ولفيت الدنيا، بس عايز أفهم: هو ليه الشمس طالعة على طول في الفضاء؟ يعني مفيش ليل ولا نهار زي ما بيقول إيلون ماسك؟ ولا دي حركات كاميرات وفبركة من بتاعة السوشيال ميديا؟”

أبو أحمد يعدل جلسته ويشرح ببساطته المعتادة وهدوئه:”سؤال في محله يا حاج رمضان.. الفكرة مش فبركة، دي طبيعة الفضاء فوق الغلاف الجوي ، على الأرض إحنا بنشوف ليل ونهار عشان الأرض بتلف حوالين نفسها، وكمان الغيوم والغلاف الجوي بيقللوا ويشتتوا جزء من أشعة الشمس ، لكن في المدار الفضائي، الشمس موجودة باستمرار تقريباً من غير ليل يقطعها ولا سحاب يحجبها، وكمان ببطاريات أصغر لأن الانقطاع قليل جداً ، ومن الناحية الاقتصادية، لو إيلون ماسك قدر فعلاً يقلل تكلفة إطلاق المعدات للفضاء بـ “ستارشيب”، وتبقى الطاقة أقل تكلفة بحوالي 30% زي ما بيقول، فده ممكن يغير حسابات الطاقة والذكاء الاصطناعي في العالم كله ، وبالنسبة لنا في مصر وفي ملف تغير المناخ، الطاقة النظيفة والمستمرة هدف كبير، بس على أرض الواقع إحنا محتاجين حلول عملية وتكلفة منطقية تناسب المواطن وتدعم الزراعة والصناعة دلوقتي مش في الخيال العلمي بس.”

المشهد الثالث: عبقرينو ورحلة إلى عام 2930

عبقرينو مصطبجي أول AI تضيء عيناه الرقميتان ويصدر صوت معالجة بيانات:”جاري حساب المسافات الفلكية وتحليل سيناريوهات الطاقة المدارية.. بيب.. بيب، يا حاج رمضان، المدار الأرضي المنخفض يبدأ على ارتفاع مئات الكيلومترات فوق سطح البحر، حيث تنعدم مقاومة الهواء والسحب اليومية، مما يرفع كفاءة الاستقبال الشمسي مقارنة بالأرض ، وبناءً على محاكاة بعيدة المدى لمصر في عام 2930 ، لو استمرت التطورات وتراجعت تكلفة النقل المداري جذرياً، قد نرى مدناً ومزارع وصوباً زراعية في مصر تدار بالطاقة الشمسية المدارية على مدار الساعة، بينما تتصدر “أم فوزي القابضة للزجاجات الشمسية المشبرة” قائمة فوربس وتكسب مليارات الدولارات من بيع زجاجات الشمس المثلجة للمدن والمجتمعات العمرانية الجديدة، بشرط الحفاظ على اللغز الفيزيائي اللي يخلي الشمس تطلع سخنة والزجاجة تطلع مشبرة!”.

خضرة زعزوعي تضحك ملء فمها وتلوح بيدها:”مليارات إيه يا عبقرينو؟، ده أم فوزي لو مسكت المليارات هتحط عليهم فيتو وتقولهم: ‘اقعدوا ساكتين في الخزنة لحد ما أشوف الزمالك هيعمل إيه”

أم فوزي تبتسم بفخر وتعدل القبعة:”مليارات حلال من عرق جبيننا الفضائي، بس بشرط يا فوزي.. لو طلعنا بـ “ستاركو شبشب”، متنساش تاخد معاك لبشة قصب منياوي لزوم القاعدة فى الشمس فى عز البرد الفضائى وكوباية شاي بالنعناع عشان الدماغ متفصلش هناك”.

الحاج رمضان يضحك ويضرب بعصاه برفق على المصطبة:”سنة 2930 دي لسه بدري عليها يا ولاد، إحنا في 2026 وشمسنا على الأرض منورة ومباركة طول ما في سعي وعمل، صب الشاي يا ولد، وسيبوا أم فوزي تعبي شمسها المشبرة في القزايز.. بس اوعوا تكسروا قزازة في المزرعة”.

تختم الكاميرا على ضحكات المصطبة في مزرعة أبو أحمد، وعبقرينو يرسل ومضة ضوئية مرحة.

محمد عبد العال

خبير مصرفي

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى