محمد عبد العال يكتب : “المَصْطَبَة الاقْتِصَاديَّة 4”

المكان: مزرعة الحاج رمضان (المقر الدائم للمصطبة الاقتصادية).

الجو ريفي ساحر، رائحة البرسيم، والقهوة تفوح، والحاج رمضان يجلس مزهوًا بـ”عباءته” الجديدة بعد عودته من العمرة.

الشخصيات: أبو أحمد، الحاج رمضان، خضرة زعزوعي، أم فوزي، فوزي تيك توك، وعبقرينو أبو العريف مصطبجى أول AI.

المشهد الأول: الصدمة 

(فوزي تيك توك يقفز فجأة من فوق “بستلة” لبن، وعينه في الموبايل)

– فوزي: “يا خبر أبيض يا جدعان! التريند جاب من الآخر، فيه مقترح قانون جديد هيقلب الطاولة على الرجالة في البيوت!”.

– خضرة زعزوعي (باهتمام): “انطق يا واد ، الحكومة هتحبسهم ولا إيه؟”.

– فوزي: “بيقولك الراجل مش من حقه يتجوز التانية إلا بـ(إذن كتابي موثق) من الزوجة الأولى! وإلا يقع عليه جزاء سجن وغرامة”.

(الحاج رمضان يسقط من يده “سبحة” اليسر وتجحظ عيناه)

– الحاج رمضان: “إذن إيه يا واد؟ دي أم العيال لو عرفت إني ناوي أجدد الأسطول هتطلب مني تنازل عن المزرعة باللي فيها! ده ميبقاش جواز ، ده يبقى استسلام غير مشروط!”.

المشهد الثاني: تضارب المشاعر 

– خضرة زعزوعي (بضحكة شماتة مجلجلة): “أيوة كدة! والله وبقى لك صاحب سيادة يا حاج رمضان يمدي لك على التصاريح! يا فرحتي فيكم يا رجالة، القانون ده زي صندوق النقد، مفيش تمويل ولا توسعات إلا بموافقة الإدارة العليا في البيت!”

– أم فوزي (بقلق): “بس يا خضرة، ده كدة الرجالة هتهج! اللي مش هيقدر ياخد إذن، هيرمي نفسه في مركب هجرة غير شرعية ويطلع على إيطاليا عشان يتجوز هناك براحته!”.

المشهد الثالث: الرؤية المتزنة 

– أبو أحمد: “استهدوا بالله يا جماعة ، الموضوع مش بس ورقة وإمضاء. إحنا قدام أزمة حقيقية؛ انفجار سكاني بيلتهم كل مجهودات التنمية ، الدولة بتحاول تعمل فرملة اجتماعية لأن معدل النمو السكاني لو استمر كدة، مفيش اقتصاد هيقدر يلاحق على خدمات تعليم وصحة وسكن لآلاف الأسر الجديدة اللي بتتبني بلا ضوابط”.

– الحاج رمضان: “يا أبو أحمد، أنا مقتدر ومعايا الموارد، وأهوه بطبق الشرع والعدد مظبوط عند أربعة!”.

– أبو أحمد: “يا حاج، مواردك دي جزء من موارد البلد، والطفل اللي هييجي محتاج نصيب من الميه والطاقة والدعم. الموضوع أكبر من مزرعة، ده أمن قومي!”.

المشهد الرابع: فك الاشتباك 

– عبقرينو أبو العريف مصطبجى (AI): “يا جماعة، الحل عندي عشان نفك الاشتباك بين حق الرجل ومصلحة البلد ، إيه رأيكم نرفع شعار: (الحرية مقابل عدم الإنجاب)؟”.

– الجميع: “إزاي يا أبو العريف؟”

– أبو العريف: “الرجل اللي عايز يعدد وياخد حريته كاملة ممكن يُمنح الرخصة الذهبية (أعطني حريتي أطلق يديَّ)، ويتم إلغاء شرط الإذن الكتابي المرهق ، بشرط واحد ، التزام علمي وطبي مؤكد بعدم الإنجاب من الزوجات التاليات للأولى ، كده الحاج رمضان ينبسط بالتجديد والبلد ميزيدش فيها طفل واحد برا الخطة الاقتصادية ، يعني تعدد ترفيهي مش تعدد إنتاجي!”.

الخاتمة 

– خضرة زعزوعي: “والله فكرة! بس اللي يخالف الشرط ده يا أبو العريف، نطبق عليه ضريبة قيمة مضافة بجد، ونصادر المزرعة لصالح العيال الغلابة!”.

– فوزي تيك توك: “يا حلاوة! هعمل فيديو وهسميه (اتجوّز وعيش.. بس عيال زيادة مفيش!)”.

أبو أحمد يبتسم وينظر للأفق بينما الحاج رمضان يحاول حساب التكاليف في صمت.

إلى اللقاء في حلقة المصطبة الاقتصادية الخامسة، حيث أم فوزى تفجر مفاجئة عالمية.

وفوزى تيك توك تشجيعًا لوالدته يخصص من جيبه الشخصي هدية رمزية (بقيمة عشرة آلاف جنيه مصري) لكل من يتوقع ماذا تنوي أم فوزى أن تفعل فى الحلقة القادمة !؟؟.

فقط اكتب توقعك في التعليقات وشير للحلقة ، لا مجاملات شخصية.

محمد عبد العال

خبير مصرفي