محمد عبد العال يكتب : رمضان واقتصاديات الصيام .. “سهرة الفيشاوي – 5”

في رمضان، الدنيا مش بس عبادة ولمة، دي كمان بيزنس وحسابات بتتحرك في كل حتة ، من فانوس رمضان لغاية مليارات المسلسلات.

قررنا السنادي ناخدكم فى بعض ليالى رمضان الجميلة في رحلة خفيفة، نفهم فيها اقتصاديات رمضان بعيداً عن لغة الأرقام المعقدة ، هنسمعها بلسان الفيشاوي بحكمته، والأستاذ عِرفان بوقاره، وحمادة ديلفرى بتساؤلات الشارع.

المكان: مقهى الفيشاوي – الحسين.

الزمان: ليلة الخميس قبل السحور، والفيشاوي واقف بنفسه يصب الشاي مكان حمادة الذي كان غائباً في السهرة الماضية بسبب تواجده مع زوجته خضرة زعزوعي في مستشفى الجلاء للولادة حيث ولدت قيصرية توأم ولد وبنت ما شاء الله.

الفيشاوي ينادي بصوت عالي : يا ابني… هات الشاي للأستاذ عرفان! والله وحشتنا يا حمادة، القهوة ناقصاها خفة دمك، بس يلا.. اللي جابلك التوأم يبارك لك فيهم ويقدرك على شيلتهم.

الأستاذ عرفان يضحك وهو يفتح الموبايل: أهو حمادة ديلفري ده يا فيشاوي، هو المثال الحي للي بيحصل في الاقتصاد دلوقت. الخبر اللي نزل عن موافقة صندوق النقد وصرف الـ 2.3 مليار دولار، جاي في وقته لحمادة وأمثاله.

حمادة داخل القهوة بخطوة سريعة، وجهه عليه الإرهاق لكن عينه بتلمع: سمعت اسمي يا أستاذ عرفان؟ جيت أطمن على القهوة وآخد التبس وأرجع لخضرة والعيال بسرعة. قل لي بقى، المليارات اللي الصندوق وافق عليها دي، هتحس بيا وبتوأم زعزوعي؟ ده أنا بقيت بشتري الحفاضات بالقطعة!.

الأستاذ عرفان يربت على كتفه: مبروك يا أبو التوأم. بص يا سيدي، الموافقة دي معناها إن الجنيه هيثبت مكانه مش هيتهز، وده معناه إن أسعار السلع المستوردة ، زي لبن الأطفال والكيماويات اللي بتدخل في الصناعة ، مش هتطير منك كل يوم وتاني ، والأهم، إن الصندوق اشترط زيادة ميزانية الحماية الاجتماعية، يعني فيه دعم أكبر هيوجه للأسر اللي زي حالتك عشان يواجهوا غلاء المعيشة.

الفيشاوي يغمز لحمادة: يعني يا أستاذ عرفان، الخبر ده مصد صدمات للاقتصاد، وزي ما حمادة محتاج سند في تربية التوأم عشان ما يغرقش، الاقتصاد كان محتاج سند الصندوق عشان يوازن خروج الأموال الساخنة اللي كانت قلقانة.

حمادة وهو بيتحرك عشان يرجع لبيته: يعني أطمن خضرة إن الستر قادم؟

الأستاذ عرفان:طمنها إن فيه استقرار، بس قول لها إننا لسه محتاجين ننتج أكتر عشان عيالنا يلاقوا مستقبل أحسن. روح يا أبو العيال، ومبارك ما جاك!.

الفيشاوي ينظر للأستاذ عرفان: أهو ده الاقتصاد بجد يا أستاذنا.. لما المليارات اللي في الورق تترجم لعلبة لبن حمادة يقدر يشتريها وهو مطمن.

وبين فرحة حمادة بالتوأم وفرحة السوق بموافقة الصندوق.. يبقى الأمل في استقرار حقيقي يلمسه كل بيت.

محمد عبد العال

خبير مصرفي