محمد عبد العال يكتب : رمضان واقتصاديات الصيام .. “سهرة الفيشاوي – 3”
قررنا السنادي ناخدكم فى بعض ليالى رمضان الجميلة في رحلة خفيفة نفهم فيها اقتصاديات رمضان بعيداً عن لغة الأرقام المعقدة
في رمضان، الدنيا مش بس عبادة ولمة، دي كمان بيزنس وحسابات بتتحرك في كل حتة ، من فانوس رمضان لغاية مليارات المسلسلات.
قررنا السنادي ناخدكم فى بعض ليالى رمضان الجميلة في رحلة خفيفة، نفهم فيها اقتصاديات رمضان بعيداً عن لغة الأرقام المعقدة ، هنسمعها بلسان الفيشاوي بحكمته، والأستاذ عِرفان بوقاره، وحمادة ديلفرى بتساؤلات الشارع.
حلقة اليوم .. “ممثـل بالكهرباء!! .. هو الـ AI هياكل لقمة عيشنا؟”
حمادة وهو بيحط كبايات الشاي بالمرمرية: يا أستاذ عِرفان، الحقني! أنا بسمع في التلفزيون وفي كل حتة (أيه آي).. (أيه آي).. هو ده فيروس جديد يا سعادة الباشا؟ ولا ده نوع شيبسي نازل في رمضان وأنا مش دريان؟
الأستاذ عِرفان يضحك بوقار: يا حمادة، الـ AI ده (الذكاء الاصطناعي)، يعني كمبيوتر بيفكر ويتعلم زينا بالظبط، لدرجة إنه بقى يقدر يكتب سيناريو مسلسل، أو يركب وش ممثل مكان ممثل تاني، ويخليك تشوف إعلان معمول مخصوص عشانك إنت لوحدك!
حمادة بصدمة وخفة دم: يا نهار أبيض! يعني ممكن يعملوا (حمادة ديجيتال) يوزع شاي مكاني في القهوة وما بياخدش بقشيش؟ طب والنجوم الغلابة اللي بياخدوا ملايين دول، الكمبيوتر ده هيسرق أدوارهم ويقعدهم في البيت؟
الأستاذ عِرفان: مش بالظبط يا حمادة، هو أداة بتوفر المليارات في الإنتاج وبتخلي الخيال حقيقة ، بس الخوف فعلاً إنه يهدد وظائف ناس كتير ويخلي الفن ملوش طعم بشري ، الدولة لازم تراقب ده عشان تضمن حقوق الناس والضرايب اللي بتدفع.
الفيشاوي وهو بيطلع دخان شيشته ببرود: بص يا حمادة.. مهما عملوا ممثلين بالكهرباء، عمرهم ما هيعرفوا يعملوا نظرة عين الست وهي بتغني “انت عمري” ولا “يا مسهرني”، ولا خفة دم إسماعيل يس ، الـ AI ممكن يقلد الوش، بس ميعرفش يقلد الروح ولا المزاج المصري.. صب الشاي يا ديجيتال وخلينا نلحق السحور!.
في الحلقة القادمة هننتقل مؤقتاً إلى محل “الجحش” للفول والطعمية بالسيدة زينب لتناول السحور مع العديد من المفاجآت بطعم الاقتصاد الرمضاني.
محمد عبد العال
خبير مصرفي
