محمد عبد العال يكتب : رمضان واقتصاديات الصيام .. (7)

أصدقاء سهرة الفيشاوي الأعزاء، نظراً لأن الاقتصاد المصري حالياً “نفسه طويل” ويعيش ويتعايش مع حرب هي خارج حدوده ، ولكن تداعياتها تصل لنا وتؤثر فينا أسرع من مسلسلات رمضان، قررنا إن سهرتنا مش هتكون مجرد كلام يومي يطير في الهوا.

الفيشاوي وعرفان ومعاهم (ملكة القعدة) أم فوزي، هينقلوا لكم “خلاصة” الأسبوع في 3 سهرات كبرى (الأحد، الثلاثاء، والخميس) ، عشان ندي فرصة للدولار يهدى، ولعرفان يراجع حساباته، ولأم فوزي تستعد لنقش وعمل وخبز كعك العيد.

انتظرونا في سهرات مركزة ومعجونة بطعم الواقع الجيو- رمضاني.

سهرة اليوم في مساء أولى أيام الحرب القائمة بين أمريكا وإسرائيل من ناحية وإيران من ناحية أخرى، والليلة السهرة في بيت حمادة دليفرى بعد أن خرجت زوجته خضرة زعزوعي من المستشفى عائدة إلى منزلها وبصحبتها طفلين توأم جدد ما شاء الله.

حمادة ديلفري وهو يحمل التوأم بضحكة عريضة: “يا أم فوزي، أنا قررت خلاص.. الواد الكبير هسميه صمود عشان يصمد قدام غلاء الأسعار والدولار، والصغير هسميه مستدام عشان يفضل رزقه مستمر ومن غير عجز في الموازنة”.

خضرة زعزوعي بدهشة: “يا حمادة يا أخويا، دي أسامي ولا عناوين أخبار؟ الناس في الحارة هيقولوا علينا إيه؟”.

أم فوزي وهي تضحك:”والله يا خضرة يا بنتي، حمادة معاه حق.. ده إحنا في زمن محتاج ‘صمود’ فعلاً.. بس يا حمادة، الواد ‘مستدام’ ده لازم تضمن له ‘سيولة’ من دلوقتي عشان ميعملش عجز في حصالة البيت”.

عرفان يدخل بالتهنئة:”مبروك يا أبا صمود ومستدام ده إنت كدة يا حمادة طبقت روشتة المواجهة’ في البيت.. صمود يعني ‘مصدات صدمات’ ومستدام يعني ‘نمو حقيقي’.. يتربوا في عزك يا بطل”.

حمادة ديلفري: “الله يبارك فيك يا أستاذ عرفان.. أنا قلت لـ ‘مستدام’ ابني: يا حبيبي إنت رزقك جاي بـ ‘فائض أصول’ ومش هسمح بأي ‘أموال ساخنة’ تخرج من مصروف البيت”.

أم فوزي وهي بتهز المنخل:”يا خضرة يا بنتي، بكرة الأيام تروق، والحرب تخلص، والـ 52 مليار دولار دول يبقوا 100، وساعتها صمود هيبقى اسمه (مودي) الدلوع، ومستدام هيبقى (ديما) اللي رزقه مغرق البيت”.

خضرة زعزوعي بضحكة صافية:”يا خالة أم فوزي، ياريت والله.. إحنا بس نعدي ‘فترة الحرب دي’ والأحوال ترجع على خير، وأنا عملهم أحلى عقيقة باللحمة بس سعرها يثبت شوية”.

حمادة ديلفري وهو بيوزع شربات:”يا خضرة، (مودي) و(ديما)، دول للمستقبل، لكن دلوقتي إحنا في مرحلة ‘تحوط’.. الواد صمود ده طالع لباباه، بيعرف يلم الليلة ويواجه التضخم بقلب ميت”.

حمادة ديلفري وهو بيمسح عرق الشغل وبيشرب الشاي بعد التراويح:”والله يا أستاذ عرفان، كلامك عن الـ 52.6 مليار دولار والاحتياطي ده يخلي الواحد يطمن ويرتاح.. الله يرحم والديك يا شيخ على الأخبار اللي تفتح النفس دي، ده إنت ريحت قلبي وقلب خضرة”.

خضرة زعزوعي وهي بتبص للتوأم:”أهو يا حمادة، الأستاذ عرفان طمنك.. مش ناقص غير إننا نعمل ‘عقيقة’ تليق بـ صمود ومستدام، عشان ربنا يبارك في ‘النمو’ بتاعهم”.

حمادة ديلفري بيضحك بصوت عالي:”عقيقة إيه بس يا خضرة؟ ده أنا شخصياً مش فاكر إنهم عملوا لي عقيقة وأنا صغير! الظاهر كان فيه ‘عجز موازنة’ أيامها في البيت، أو يمكن كان فيه ‘تداعيات حرب’ تانية خالص خلتهم يأجلوا المشروع”.

أم فوزي وهي بتضحك:”يا واد يا حمادة، إنت كنت نازل في وقت ‘تقشف’ وشكلك كدة كنت ‘دين عام’ على العيلة! بس ميهمكش، ‘صمود’ و’مستدام’ رزقهم واسع، ويبشروا بالخير.”

عرفان مبتسماً:”خلاص يا حمادة، اعتبر إن صمود ومستدام هما ‘العقيقة’ اللي ربنا عوضك بيها.. بس المهم يا بطل، بكرة الاثنين والأسواق هتفتح في العالم، وعايزك تكون ‘صامد’ في مشاويرك، و’مستدام’ في شغلك، وما تخليش إشاعات ‘خروج الأموال’ تأثر على معنوياتك.”

حمادة ديلفري:”ولا يهمك يا أستاذ عرفان، أنا ‘متحوط’ وجاهز.. واللي عنده “حصن” زي اللي حكيت عنه ده، ما يخافش من الهوا.. ياللا يا خضرة، هاتي لنا حتة كنافة ‘مستدامة’ كدة نحلي بيها، والرزق يحب الخفية”.

محمد عبد العال

خبير مصرفي